Аймгийн ИТХ-ын дарга Ж.Мөнхчулуун сумдын ИТХ-ын дарга, нарийн бичгийн дарга нартай уулзлаа. Уулзалтаар аймгийн ИТХ-аас баримтлах бодлого, сумдын ИТХ-ын ажлын албыг чадавхжуулах, туршлага судлах зэрэг асуудлуудыг ярьж санал бодлоо солилцлоо.

Аймаг, нийслэл, сум, дүүргийн иргэдийн Төлөөлөгчдийн Хурлын ээлжит сонгуулийн үр дүнд шинээр бүрдсэн иргэдийн Төлөөлөгчдийн Хурал, түүний төлөөлөгч, сумдын Засаг дарга нарт авлигын эсрэг хууль тогтоомжийг сурталчлан таниулах, авлигаас урьдчилан сэргийлэх чиглэлээр заавар зөвлөгөө өгөх, мэргэжил арга зүйн удирдлагаар хангах, авлигын эсрэг соён гэгээрүүлэх өдөрлөг арга хэмжээг улс даяар зохион байгуулахаар Авлигатай тэмцэх газрын ажлын хэсэг орон нутагт ажиллаж байна. 2024 оны 12 дугаар сарын 05-06-ны өдрүүдэд Авлигатай тэмцэх газрын Авлигатай тэмцэх үндэсний хөтөлбөрийг хэрэгжүүлэх хэлтсийн дарга, эрхэлсэн комиссар М.Даваатогтох ахлагчтай ажлын хэсэг Дундговь аймагт ажиллаж аймаг сумдын ИТХ, төлөөлөгч, Засаг дарга, нарийн бичгийн дарга бөгөөд ЭБАТ-уудад сургалт зохион байгууллаа. АТГ-ын Авлигатай тэмцэх үндэсний хөтөлбөрийг хэрэгжүүлэх хэлтсийн ахлах ажилтан, ахлах комиссар Х.Оюунбаатар "Авлигатай тэмцэх үндэсний хөтөлбөр", Хяналт шалгалт, дүн шинжилгээний хэлтсийн Ж.Мөнхжаргал "Нийтийн албан тушаалтнуудад зориулсан мэдээлэл", Урьдчилан сэргийлэх, соён гэгээрүүлэх хэлтсийн ажилтан, комиссар Н.Батчулуун "Авлигаас урьдчилан сэргийлэх үйл ажиллагаа", Авлигатай тэмцэх үндэсний хөтөлбөрийг хэрэгжүүлэх хэлтсийн дарга, эрхэлсэн комиссар М.Даваатогтох "Авлигын гэмт хэрэг" сэдвүүдээр мэдээлэл өглөө. Дундговь аймгийн ИТХ-ын дарга Ж.Мөнхчулуун хэлсэн үгэндээ "Шинэ тутам сонгогдсон ИТХ-ын дарга, төлөөлөгчид, шинээр томилогдсон Засаг дарга нарын хэрэгцээ шаардлагад нийцсэн, бодит жишээ баримт дээр тайлбарласан, урьдчилан сэргийлсэн, сонирхолтой сургалт мэдээлэл боллоо" гэж сургалтыг дүгнэлээ.

Аймаг сумын ИТХ-ын төлөөлөгчдийг чадавхжуулах сургалтыг 2024 оны 12 дугаар сарын 05-ны өдөр зохион байгуулж байна. Сургалтад аймаг, сумын ИТХ-ын дарга, Засаг дарга, төлөөлөгчид, нарийн бичгийн дарга, ажлын албаны албан хаагчид нийт 300 гаруй хүн оролцлоо. Сургалтыг нээж аймгийн ИТХ-ын дарга Ж.Мөнхчулуун үг хэлж сургалтад оролцогчдыг сургалтандаа хариуцлагатай, идэвхтэй оролцож мэдлэг, мэдээллээ нэмэгдүүлэхийг хүслээ. Удирдлагын академийн Төрийн захиргааны тэнхимийн багш Доктор, Профессор Я.Бямбаяр "Нутгийн өөрөө удирдах байгууллагын үйл ажиллагаа, зохион байгуулалт: Хуралдаан, зөвлөл, дэд хороо,түр хороо, ажлын хэсэг, ажлын алба, Нутгийн өөрөө удирдах байгууллага, Төлөөлөгчийн бүрэн эрх, үйл ажиллагаа, хариуцлага" сэдвээр, Удирдлагын академийн багш Доктор, дэд профессор А.Алтанзул Хууль тогтоомжийн хэрэглээ” сэдвээр тус тус мэдээлэл өглөө.

Монгол Улсын засаг захиргаа, нутаг дэвсгэрийн нэгж, түүний удирдлагын тухай хуульд аймгийн ИТХ-ын дэргэд хороод ажиллахаар заасан бөгөөд аймгийн ИТХ-ын 2024 оны 11 дүгээр сарын 15-ны өдрийн 9 дүгээр тогтоолоор хурлын хороодыг байгуулсан Өнөөдөр (2024.12.02) аймгийн ИТХ-ын Төсөв санхүү, эдийн засгийн хуралдаж, Эм эргэлтийн сан, Хөрөнгийн асуудал болон Аймгийн 2025 оны төсвийн төслийг хэлэлцлээ. ИТХ-ын Хороо нь Хурлын тасралтгүй, байнгын үйл ажиллагааг хангаж, Хурлын хуралдаанаар хэлэлцэх асуудлыг урьдчилан бэлтгэж, санал, дүгнэлт гаргах, Хурлын тогтоол, шийдвэрийн биелэлтийг хянан шалгах чиг үүргийг хэрэгжүүлнэ.